Outro garabato "3D"

Eu non sei se a vós tamén vos pasa, pero eu no colexo-instituto-carreira e agora nas reunións sempre fun dos de andar garabateando e debuxando tonterías. Pero ollo, prestando atención a todo o que sucedía. Recordo que isto último non o crían moitos profesores e tenme caído algún que outro "toque de atención".

Pero cando me propoñía aparentar estar atento (ademais de estalo) mirando directamente aos ollos do profesor e asentindo coa cabeza como o máis pelota dos alumnos... era xusto nese momento cando se me iba a cabeza á praia, a pensar no windguru, na mellor praia para surfear, nas cousas que tiña que facer, na rapaza que che gustaba, etc...

Onte, nunha reunión da Aaag, púxenme a facer isto...

(coloquei un pouco mal o boli que se vos fixades na puntiña parece que está levitando)
O debuxo que colguei fai pouco dun afialapis foi feito colocando de pé un de verdade, e debuxaba mirando todo o rato dende o punto de vista que había que ter para velo "levantado". Nesta ocasión, como non era plan estar pegando a cabeza á mesa cada dous por tres, debuxei todo calculando como se debería de ver o debuxo dende un punto de vista en concreto. Digamos que a "ojímetro". Se a reunión xa foi longa, máis se me fixo ao desexar ver se aquel garabato estirado tiña algunha forma desde algún lado.

Teño unhas ganas tremendas de contarvos un proxecto que se está cocendo un chisquiño relacionado con isto, pero ata que non haxa nada firmado prefiro non botar ningún fogo.

Unha aperta!